Մեկնարկել է «Քաղաքացիական կրթություն․ առցանց դասընթաց ուսուցանողների համար» ծրագիրը

Կարևորելով կյանքի դժվարին իրավիճակում հայտնված երեխաների լիարժեք զարգացմանն ուղղված նախապայմանների ստեղծումն՝ Աշխատանքի և սոցիալական հարցերի նախարարության նախաձեռնությամբ մեկնարկել է «Քաղաքացիական կրթություն․ առցանց դասընթաց ուսուցանողների համար» ծրագիրը։ Այն իրականացվում է նախարարության ենթակայությամբ գործող երեխաների խնամք և պաշտպանություն իրականացնող շուրջօրյա և ցերեկային հաստատությունների աշխատակիցների ներգրավմամբ՝ ԱՍՀՆ և շվեյցարական «ԿԱԶԱ» մարդասիրական հիմնադրամի միջև կնքված փոխըմբռնման հուշագրի շրջանակում։

Առցանց ձևաչափող իրականացվող երկամսյա կրթական գործընթացին մասնակցում է երեխաների խնամքի հաստատությունների 40 աշխատակից։ Վերջիններս հնարավորություն ունեն տեղեկանալ և ծանոթանալ քաղաքացիական կրթության նպատակներին ու խնդիրներին, ակտիվ քաղաքացիության կոմպետենցիաներին, ինչպես նաև վերջինիս կարևորությանը համայնքի զարգացման գործում։ Մասնակիցները նաև առցանց հարթակով ստանում են մի շարք թեմաների վերաբերյալ անհրաժեշտ տեղեկատվություն, ուսումնասիրում և գործնականում կիրառում և տեղայնացնում դրանք։

Կրթական գործընթացի շրջանակում ԿԱԶԱ-ն նախատեսում է հաստատություններում կազմակերպել կրթական գործիքների աշխատարաններ, որտեղ կարող են այցելել հաստատության մասնագետները՝ կիրառական գործիքակազմի հարստացման նպատակով։ Մասնակից հաստատություններին կտրամադրվի հիմնադրամի կողմից ստեղծված կրթական խաղերի փաթեթ, որոնք մասնագետները կկիրառեն երեխաների հետ աշխատանքում։

ԿԻՍՎԵԼ